Алғашқы пайғамбар Адам атадан (с.ғ.с.) бастап Мұхаммед (с.ғ.с.) пайғамбарға дейінгі аралықта көптеген пайғамбарлар келіп, кетті. Жіберілген пайғамбарлардың саны туралы Құран Кәрімде қандай да бір нақты мәліметтер кездеспейді. Бір хадисте жіберілген пайғамбарлардың саны 124 000 делінсе, олардан 315-інің расулдар болғаны туралы ақпарат айтылған (Ахмад бин Ханбал, Муснад, V, 266). Пайғамбарлардың жиырма бесінің есімі Құран Кәрімде аталады. Құран Кәрімде аты аталған пайғамбарлар мыналар:
Адам (с.ғ.с.), Салих (с.ғ.с.), Ысқақ (с.ғ.с.), Шұғайыб (с.ғ.с.), Сүлеймен (с.ғ.с.), Әлясағ (с.ғ.с.), Ыдырыс (с.ғ.с.), Лұт (с.ғ.с.), Яқуб (с.ғ.с.), Һарун (с.ғ.с.), Әйюуб (с.ғ.с.), Зәкәрия (с.ғ.с.), Нұх (с.ғ.с.), Ибраһим (с.ғ.с.), Юсуф (с.ғ.с.), Мұса (с.ғ.с.), Юнус (с.ғ.с.), Яхия (с.ғ.с.), Һуд (с.ғ.с.), Исмайл (с.ғ.с.), Зүлкифіл (с.ғ.с.), Дәуіт (с.ғ.с.), Ілияс (с.ғ.с.), Иса (с.ғ.с.), Мұхаммед (с.ғ.с.).
Бірақ, Құран Кәрімдегі бір аятта «Расында сенен бұрын талай пайғамбар жібердік. Олардың кейбірін саған баяндадық, кейбірін баяндамадық. Ешбір пайғамбар Алланың рұқсатынсыз ешқандай мұғжиза әкеле алмайды. Қашан Алланың әмірі (қиямет) келген кезде, олардың арасында (хақ) үкім шығарылады. Онда ақиқатқа қарсы шыққандар зиян шегеді» – деп бұйырылған (Мумин сүресі, 78 аят). Осы аятты негізге ала отырып, пайғамбарлардың саны туралы қандай да бір санды айтпай ақ, «Адам атадан (с.ғ.с.) бастап Мұхаммед (с.ғ.с.) пайғамбарға дейінгі аралықта жіберілген барлық пайғамбарларға сендім, бәрінің де хақ және шын екенін қабылдаймын» деп айтқан дұрыс болады.
Мұса пайғамбар Құранда қанша рет аталған??