Өйткені бұған қатысты мынадай хадис бар: «Араларыңнан біреу намаз оқу барысында қанша рәкағат оқығанына қатысты күмәнданса, намазын қайта оқысын» (Насбур-райя т.2, 173-б. Зәйлағи бұл хадисті «ғариб» деп тапқан).Сондай-ақ тағы бір хадисте: «Үш рәкағат па, төрт рәкағат па деп қанша рәкағат оқығанын есіне түсіре алмаған кісі есіне түсіргенге дейін намазын қайта оқиды», – делінген. Бұл жағдайда намазын қайта оқығанда қанша рәкағат оқығанына толық сенімді болады.
Қанша рәкағат оқығанына қатысты сенімсіздік намаздың соңғы отырысында тәшаһһудтан кейін немесе сәлем берудің алдында яки сәлем бергеннен кейін туындаса, онда намазды қайта оқудың қажеті жоқ.
Ал егер осылай күмандану әр намазда қайталана беретін болса, бұл жағдайда да намаз қайта оқылмайды. Күмәнданған кісі басым болған ойына қарай намазын жалғастыра береді. Мысалы 3 рәкағат оқыдым деген ойы басым болса, сол оймен төртінші рәкағатты жалғастырады. Себебі күмән әрдайым қайталана беретін болса, бұл уәсуәса, яғни шайтанның көкірекке салған күмәні болып саналады. Мұндай күмәнға берілместен адам өзіндегі басым болған ойымен намазын жалғастыруы қажет. Әрі әр уәсуәса сайын намазды қайта оқу адамға қиындық тудырады. Сондықтан Пайғамбарымыз (с.а.с.) хадисінде: «Кімде-кім намазда тұрғанда күмәнданса, дұрысын іздестірсін» деген.
Егер кісіде ешқандай ой басым болмаса, онда ең аз рәкағатты негізге алып, ары қарай намазын жалғастыра береді. Себебі ең аз рәкағатта күмән болмайды. Мысалы үш рәкағат немесе төрт рәкағат оқығанын білмей тұрса, әрі қанша рәкағат оқығанына басым ойы да болмаса, онда екі рәкағат оқығанын негізге алып, намазын үшінші рәкағаттан жалғастырады. Сонда жүрегінде күмән қалмайды. Әбу Саид әл-Худри жеткізген хадисте Пайғамбарымыз (с.а.с.): «Кәмде-кім намаз оқып тұрғанда күмәнданып, үш рәкағат немесе төрт рәкағат оқығанын біле алмаса, күмәндануын доғарсын және ең аз рәкағат санын негізге алып намазын жалғастырсын», – деген. (Насбур-райя, II-т.)
