Сұрақ: Құбылаға қарап намаз оқу міндет пе?
Жауап: Құбылаға қарау – намаздың сыртқы парыздарының бірі. Мекке қаласындағы Қағбаға (құбылаға) қарап намаз рәсімін орындау Алла Тағаланың тікелей бұйрығы. Бұл жайлы Құран аяты да бар.
Құбыла мұсылмандар үшін өзіндік тарихы бар қасиетті мекен. Сондай-ақ құбылаға қарап орындайтын басқа да амалдар бар. Қазақ әдебінде «құбылаға қарап жағымсыз әрекеттер істеме» деген сынды тыйымдар да бар.
«Бақара» сүресінің 144-аятында: «(Уа Мұхаммед) Расында, сенің (уахидің келуін күтіп) жүзіңді қайта-қайта көкке қарата бергеніңді көрудеміз. (мұңайма), сені міндетті түрде көңіліңе жағатын құбылаға бағыттаймыз. Қане, жүзіңді Харам мешітіне қарай бұр. (Уа, мүміндер!) сендер де қай жерде болсаңдар да жүздеріңді Харам мешітіне қарай бұрыңдар» деген.
Жер шарының қай мекенінде болса да, барлық мұсылманның бір бағытқа қарап құлшылық (намаз) етуі үмбеттің ұйымшылдығын, теңдігін және бір Жаратушыға бас иетінін көрсетеді. Демек, құбылаға қарай бет бұруға шамасы жоқ, аса үзірлі уақыттардан тыс жағдайларда құбылаға қарап намаз оқу парыз.
Икрам АЙТАЕВ
