Сұрақ: Құбылаға қатысты қандай тыйымдар бар?
Жауап: Құбыла – Мекке қаласында орналасқан қасиетті мекен. Мұсылман адам жүзін құбылаға қаратып, құлшылық амалдарын орындайды. Бұл Құран аятымен бекітілген, шариғаттың талабы.
Мұсылман әдебі құбылаға қарап дәрет сындырудан, мешітте немесе үйде себепсіз аяғын созудан, т.б. жағымсыз амалдардан қайтарған. Мұндай амалдар Қағбаға деген ықылассыздық пен құрметсіздік амалдарына жатады. Құбылаға қарап жағымсыз әрекет жасау Исламда әдеп пен құрметке қатысты тақырыптарда қарастырылған.
Жалпы Ислам ғалымдары құбылаға қарап дәрет сындыруды жағымсыз іс деп бағалаған. Үй ішінде немесе жабық әжетханада болса да, мүмкіндігінше құбылаға қарамай дәрет сындырған абзал. Әжетхананы соққанда да осы әдепке мән бергені дұрыс.
Пайғамбарымыз (с.а.у.) хадисінде: «Сендерден біреу дәрет сындырғанда, құбылаға қарап немесе құбылаға арқасын беріп отырмасын…» деген. Демек, ашық далада, яғни ғимаратсыз жерде құбылаға қарап немесе ол тарапқа теріс қарап дәрет сындыруға болмайтындығын байқауға болады.
Икрам АЙТАЕВ
