Ұлттық кітапхана қызметкерлері Мәскеудегі Ресей мемлекеттік кітапханасының базасында «Классикалық парақтық реставрация: жетілдірілген курс» атты біліктілікті арттыру курсынан өтті.
80 академиялық сағатқа созылған оқу бағдарламасы аясында қағаз негізіндегі тарихи және сирек құжаттарды сақтау және қалпына келтіру бойынша теориялық әрі практикалық сабақтар өткізілді.
Оқу барысында еліміздің мамандары кітапхана қорындағы материалдармен жұмыс істеудің заманауи технологияларын меңгеріп, тәжірибелік дағдыларын жетілдірді. Сондай-ақ мәдени мұраны сақтау бағытындағы Ресей мемлекеттік кітапханасының тәжірибесімен танысты.
Бағдарлама қорытындысында қатысушылар қорытынды аттестаттаудан өтіп, оларға біліктілігін арттырғаны туралы куәлік табысталды.
Оқу бағдарламасы Қазақстан Республикасы Ұлттық кітапханасы мен Ресей мемлекеттік кітапханасы арасындағы кәсіби ынтымақтастықтың жалғасы болды. Бұл бастама сирек кітапхана қорларын қалпына келтіру және сақтау ісімен айналысатын мамандардың кәсіби біліктілігін жетілдіруге бағытталды.
