Франция Сыртқы істер министрлігі оккупацияланған Батыс жағалау мен Шығыс Иерусалимдегі палестиналық аумақтарда заңсыз еврей қоныстанушылары тарапынан жасалып жатқан зорлық-зомбылық әрекеттерінің жиілеп кеткенін атап өтті.
Франция оккупацияланған Иордан өзенінің Батыс жағалауының солтүстігінде орналасқан Қусра елді мекенінде заңсыз еврей қоныстанушыларының бірнеше палестиналықтың үйін басып алуын, сондай-ақ бейбіт тұрғындарға қатысты зорлық-зомбылық әрекеттерін қатаң айыптады.
Бұл туралы Франция Сыртқы істер министрлігінің мәлімдемесінде айтылған.
«Франция Израиль билігін бұл әрекеттерге кінәлілерді анықтап, оларды жауапкершілікке тартуға шақырады», – делінген мәлімдемеде.
Ведомство өкілдері оккупацияланған Батыс жағалау мен Шығыс Иерусалимдегі палестиналық аумақтарда израильдік қоныстанушылар тарапынан жасалатын зорлық-зомбылық әрекеттерінің жиілеп кеткенін атап өтті. Франция Сыртқы істер министрлігі Израиль билігін палестиналық бейбіт тұрғындарды қорғау үшін барлық қажетті шараларды қабылдауға шақырды.
Мәлімдемеде бұл халықаралық құқыққа сәйкес Израиль билігінің міндеті екені атап көрсетілген.
«Франция Израильдің отарлау саясатын айыптайтынын тағы да мәлімдейді. Бұл саясат екі мемлекет құру туралы шешімге қауіп төндіріп, жергілікті жердегі шиеленістің ушығуына алып келеді», – делінген құжатта.
