Сұрақ: Әулие жерлерге барып түнеуге бола ма?
Жауап: «Әулие» ұғымы – Ислам дінінен енген, қазақтың бай рухани дүниесімен үйлескен сөз. Ол Аллаға жақын, оның әмірін орындаушы адам, сүйікті құлы, қасиетті адам, тақуа адам, керемет иесі деген ұғымда қолданылады.
Біздің жерімізде Қожа Ахмет Ясауи, Арыстан бап, Бекет ата, т.б. сынды орындар тарихи және киелі саналады. Ислам тағылымында тарихи және әулиелі жерлердің қабірін зиярат ету – сауапты іс. Зиярат жасауда шариғат бекіткен өзіндік әдептер мен талаптарды дұрыс орындау қажет.
Адамдар арасында дін негіздерін білмей, түрлі окульттік діни танымдарды дін деп, еліктеп жүргендер кездеседі. Әдетте олар әулиелі жерге барсаң дертіңе дауа табасың, перзентті боласың, т.б. деп сендіреді. Сонымен қасиеті жұқсын деп орамалын мазарға сүртетіндер, арқасын кесенеге үйкелейтіндер де, тіпті түнейтіндер де бар. Мұндай іс-әрекеттер Ислам бұйырған амалдар санатынан емес.
Негізі Ислам тағылымында зияратқа шыққан кісі марқұмдар рухына Құран бағыштап, оған дұға етуі құпталған іс. Ал дүниелік және ақыреттік қажеттілікті сұрап, дұға тілегенде Алла Тағаладан сұрау мақсатты болып саналады. Дұғаларды қабыл етуші Алла екенін білгеніміз дұрыс.
Пайғамбарымыз (с.а.у.) хадисінде: «Қабірлерді зиярат етіңдер. Өйткені қабір сендерге қияметті еске түсіреді», деген. Демек, әулиелі жерлерге зияратқа барғанда түнеу сынды артық амалдардан сақ болғанымыз дұрыс. Дертін берген Алла шипасын да берері хақ.
Икрам АЙТАЕВ
