Таиз провинциясындағы үкіметтік дереккөздердің мәліметінше, хуситтер Сабр әл-Мавадим ауданын атқылаған.
Иран қолдайтын Йеменнің «Ансар Аллах» қозғалысы (хуситтер) елдің оңтүстік-батысындағы Таиз провинциясын атқылап, салдарынан үш бейбіт тұрғын, оның ішінде екі әйел қаза тапты. Тағы бес адам жарақат алды.
Таиз провинциясындағы үкіметтік дереккөздердің хабарлауынша, хуситтер аймақтың оңтүстігінде орналасқан Сабр әл-Мавадим ауданын атқылаған. Салдарынан үш бейбіт тұрғын, оның ішінде екі әйел көз жұмды.
Бұдан бөлек, Таиздің оңтүстігіндегі Шакаб және батысындағы Акака аудандарына жасалған шабуылдардан бес бейбіт тұрғын, соның ішінде екі әйел жарақат алды.
Бұған дейін Йемен армиясы Таиз провинциясында хуситтердің шабуылына тойтарыс беру кезінде Иран қолдайтын «Ансар Аллах» қозғалысының 16 мүшесі жойылғанын хабарлаған еді.
Қызыл теңіз жағалауындағы Ходейда провинциясынан Таизге қарай бағытталған хуситтердің шабуылы басталған өткен айдан бері таулы аймақтағы қарулы қақтығыстардың қарқыны күшейген. Хуситтер Баб әл-Мандеб бұғазына қарай жылжуды көздеп отыр.
Иран қолдайтын «Ансар Аллах» қозғалысы 2014 жылдың қыркүйегінен бері Йемен астанасы Сананы және елдің бірқатар өзге аумақтарын бақылауында ұстап келеді.
Ал 2015 жылдың наурызынан бастап Сауд Арабиясы бастаған коалиция хуситтерге қарсы күресте Йемен үкіметіне қолдау көрсетіп келеді.
