16 маусымда Қызылорда қаласындағы №60 түзеу мекемесінің Дерадикалдандыру орталығында Ақниет ақпараттық-насихат және оңалту орталығының бастамасымен және «Асыл мұра – Орда» қоғамдық қорының ұйымдастыруымен сотталған азаматтарға арналған рухани-мәдени іс-шара өткізілді.
Іс-шараның мақсаты – ұлттық құндылықтарды дәріптеу, дәстүрлі мәдени мұраны насихаттау және сотталған азаматтардың рухани-адамгершілік тәрбиесін нығайту.
Шара аясында қазақ халқының дәстүрлі музыкалық өнері таныстырылып, арнайы шақырылған өнерпаздар ұлттық күйлер мен термелер орындады. Қобызшы, күйші, жыршы-термеші және сырнайшының өнер көрсетуі қатысушылардың ерекше қызығушылығын тудырды. Сонымен қатар патриоттық әндер шырқалып, қазақ халқының дәстүрлі өнері мен мәдениетінің тарихи және тәрбиелік маңызы жөнінде ақпарат берілді.
Іс-шара барысында ұлттық тағамдардан қазақы дастархан жайылып, қатысушыларға бауырсақ, май, қаймақ, құрт, ірімшік, жент, талқан, қымыз және шұбат ұсынылды. Бұл өз кезегінде ұлттық салт-дәстүр мен мәдениетті насихаттауға ықпал етті.
Кездесу соңында сотталған азаматтар ұйымдастырушыларға ризашылықтарын білдіріп, ұлттық өнер мен мәдени мұраны дәріптеуге бағытталған осындай іс-шаралардың тәрбиелік маңызы зор екенін атап өтті.
Жалпы, іс-шара жоғары деңгейде ұйымдастырылып, қатысушылар тарапынан оң бағасын алды.
Осы орайда аталған іс-шараның жоғары деңгейде өтуіне қолдау көрсетіп, оның жүзеге асуына ықпал еткен Қызылорда облысының Дін істері басқармасына және басқарма басшысы Мира Жомартқызы Қазбековаға ерекше алғыс білдіреміз.
Ақниет ақпараттық-насихат және оңалту орталығының Қызылорда облысы бойынша бөлім жетекшісі Айболат Абзалұлы ұлттық құндылықтарды дәріптеуге бағытталған мұндай рухани-мәдени іс-шаралардың тәрбиелік маңызы зор екенін атап өтіп, алдағы уақытта да осы бағыттағы жұмыстар жалғасын табатынын жеткізді.
