Премьер-министрдің депутаттық сауалға берген жауабында Әкімшілік құқық бұзушылық туралы кодексінің 434-бабына сәйкес қоғамдық орындарда балағат сөз айту, азаматтарға тиісу және айналадағы адамдарға құрметсіздік танытып, қоғамдық тәртіп пен тыныштықты бұзатын өзге де әрекеттер ұсақ бұзақылық болып саналатыны айтылған, деп хабарлайды Egemen.kz
Премьер-министрдің айтуынша, мұндай әрекеттер үшін 20 айлық есептік көрсеткіш (АЕК) көлемінде айыппұл салынады немесе 20-дан 60 сағатқа дейін қоғамдық жұмыстарға тарту, не 5-тен 15 тәулікке дейін әкімшілік қамауға алу жазасы қарастырылған.
Бұл туралы Олжас Бектенов қазақстандық интернет кеңістігінде қызу талқыға түскен трансформациялық тренингтердің біріне қатысты бейнежазбаны түсіндіру барысында мәлімдеді.
Сонымен қатар, премьер-министр қазіргі уақытта «Онлайн-платформалар және бұқаралық ақпарат құралдары мәселелері бойынша Әкімшілік құқық бұзушылық туралы кодексіне өзгерістер мен толықтырулар енгізу туралы» заң жобасы әзірленгенін хабарлады.
Аталған құжатта онлайн-платформаларда балағат сөз қолданғаны үшін әкімшілік жауапкершілік енгізу көзделген. Заң жобасы биыл Парламенттің қарауына ұсынылады.
Сондай-ақ, коучтар кәсіби қызметін жүзеге асыру кезінде кәсіби қауымдастықтар мен федерациялардың этикалық кодекстерін сақтауға және қызметтерін адалдық, теңдік пен кемсітпеу қағидаттарына сай көрсетуге жеке жауапты болатыны атап өтілді.
Бұдан бөлек, даулар мен жанжалдарды өркениетті түрде шешуді қамтамасыз ету және медиация институтына деген сенімді арттыру мақсатында биыл медиаторлардың Этикалық кодексі әзірленіп жатыр. Құжат өзара құрметке негізделген қарым-қатынасты нығайтуға бағытталған.
