Алла нәсіп етіп Мина ойпатына да келіп қалдық. Бар адам әппақ ихрамдарын киіп, бір жерге жиналғаны үлкен құбылыс екен. Бұл жерді бәрін бірдей қылып, байын да, кедейін детеңеген жер десе болады.
Әлбетте, әр пенде Құдай алдына тек иманымен, амалымен ғана барары сөзсіз. Қажылықтың әрбір шарттары пендені жүрегін перделеген дүниеден арылтып, имани сезімдерін оятып, кешірім сұратып, күнәсінен арылып, тазарып қайтуына апаратын жол екені ақиқат.
Осындай бір қажылыққа келгенімде, марқұм жақын ағамыз: «Бауырым, Алламен байланыста жүрсің, адамдармен байланысыңды сәл азайта тұр», деп ескерткен еді. Алла жанын жәннаттан етсін, дұрыс айтқан екен…
Үй-ішіңмен, туыстармен, достармен аздап болсын хабар алысып тұрған дұрыс-ақ, бірақ негізгі мақсат – қажылықтан ажырамауымыз керек.
Бұл жердегі әрбір сәт, білген адам үшін дүниедегі ең қымбат, жәннатқа апаратын бақытты мезеттер емес пе?
Алла баршамызға қабыл болған қажылықты нәсіп етсін!
Қуат ҚАБДОЛДА
