Сұрақ: Қажылыққа баруға жағдайы бола тұра, орнына басқа біреуді жіберуге бола ма?
Жауап: Қажылық – Исламның бес парыздың бірі. Жағдайы бар адамдарға бір рет қажылық жасау міндет. Қажылық рәсімі белгілі бір айда жасалатын, адамға рухани күш беретін құлшылық түрі.
Адамның денсаулығы мен дүниесі болып тұрса, қажылық рәсімін өтеуі қайырлы. Өзі қажылық рәсімін өтеп қойған болса, нәпіл қажылығына сауап үшін өзгені жіберуіне болады.
Исламда қажылық ғибадатының парыз болуы үшін адамның денсаулығы мен қаржылай жағдайы жеткілікті болуы шарт. Ал, шариғатта денсаулығы жақсы, шамасы жететін адамның өз орнына басқа біреуді қажылыққа жіберуі құпталмайды. Өзінің діни жауапкершілігіндегі құлшылығын өзі орындау мақсатты болып есептеледі.
Сондай-ақ белгілі шарттармен қажылыққа рұқсат етіледі, егер: әкесі қайтыс болған болса оның атынан қажылық жасауына, ата-анасы тірі болып, ол екеуі қарттыққа, жазылмайтын сырқатқа байланысты орындай алмаса өтеуіне болады.
Сонымен бірінші қажылықты өзің өтеп, содан кейін ата-анасының атынан қажылық жасауына шариғат рұқсат береді. Демек, шынайы ниетпен, тақуалықпен орындалған құлшылықта мол сауап бар екен.
Икрам АЙТАЕВ
