мен Қазіргі жаһандану дәуірінде ақпарат ағыны күшейіп, дін тақырыбы да түрлі бағытта таралып отыр. Осы тұста қоғам үшін ең қауіпті құбылыстардың бірі – жат ағымдар. Олар діннің сыртқы формасын пайдаланып, оның шынайы гуманистік, адамгершілік мазмұнын бұрмалайды. Нәтижесінде жеке адамға да, тұтас қоғамға да ауыр зардап әкеледі.
Жат ағымдардың басты нысанасы – діни білімі таяз, рухани ізденістегі жастар. Мұндай топтар адамды біртіндеп өз ортасына тәуелді етіп, сыни ойлау қабілетін әлсіретеді. Ата-анаға, қоғамға, мемлекетке қарсы көзқарас қалыптастырып, адамды өз отбасынан, туған ортасынан алыстатады. Кей жағдайда адамның психологиялық күйі бұзылып, агрессияға, төзімсіздікке бой алдырады.
Отбасы – қоғамның іргетасы. Жат ағым ықпалына түскен адам отбасылық құндылықтарды теріске шығарып, туыстық қатынасты үзіп жатады. Бұл – бір отбасының ғана емес, бүтін қоғамның әлсіреуіне апаратын жол. Қоғамда алауыздық, бірін-бірі «дұрыс», «бұрыс» деп бөлу, төзімсіздік күшейеді. Мұндай ахуал ұлттық бірлікке сызат түсіреді.
Жат ағымдар діни мәтіндерді өз мүддесіне сай тар мағынада түсіндіріп, зорлық-зомбылықты ақтауға дейін барады. Бұл – діннің табиғатына мүлде жат құбылыс. Нағыз дін адамды бейбітшілікке, сабыр мен парасатқа, жауапкершілікке шақырады. Ал радикалдық идеология дінді саясаттың, қақтығыстың құралына айналдырады.
Жат ағымдардың алдын алуда діни сауаттылық шешуші рөл атқарады. Мектептен бастап, отбасында, қоғамда дін туралы дұрыс, байыпты түсінік қалыптастыру қажет. Дінді үстірт емес, оның тарихи-мәдени, рухани қырларымен бірге таныту – адасудан сақтайды. Сондай-ақ жастарды жұмыспен қамту, әлеуметтік қолдау, ашық диалог алаңдарын құру да радикалданудың алдын алады.
Жат ағымдар – тек діни мәселе емес, ұлттық қауіпсіздік пен қоғамдық тұрақтылыққа төнген қатер. Оған қарсы күрес тыйыммен ғана емес, біліммен, түсіндірумен, парасатты оймен жүргізілуі тиіс. Рухани иммунитеті мықты қоғам ғана мұндай қауіпке төтеп бере алады.
Жасұлан БАҚЫТБЕК
