Сұрақ: Ырымға сенуге бола ма?
Жауап: Әр ұлттың өзіндік қалыптасқан ырымдары мен тыйымдары бар. Исламда жақсы тағылымға, тәрбиеге бағытталған ырымдар дінге қайшы емес. Орынсыз түрлі жағдайларда туындаған ырымдарды жаманшылыққа жоруға болмайды. Ата-бабамыз жамандықпен байланыстырған ырымдарды нақтылап, жаман ырымдардың салдарын айтып, қайтарып отырған.
Пайғамбарымыз (с.а.у) хадисінде: «Бір күні Алла елшісінің (с.а.у.) мәжілісінде жақсы-жаман ырымдарға қатысты әңгіме қозғалған еді. Сонда Алла елшісі (с.а.у.) «Ең абзалы – жақсылыққа жору, сондықтан жаман ырым ешуақытта мұсылманды алған бетінен қайтармасын. Қайсыбірің көңіліне жақпайтын қандай да бір нәрсе (құбылыс) көрсе: «Уа, Алла тағалам! Жақсылық атаулының барлығы бір Өзіңнен ғана келеді. Сондай-ақ, жамандық атаулыға бір Өзің ғана тосқауыл бола аласың. Нағыз құдірет Саған ғана тән әрі бізге күш-қуат беретін де бір Өзіңсің», деп дұға етсін», деп айтты» деген.
«Жақсы сөз – жарым ырыс» дегендей, жақсылыққа жорып, жақсы сөз айту Ислам тағылымында құпталған қайырлы іс екен.
Икрам АЙТАЕВ
