Бүгінгі таңда елімізде Қазақстан мұсылмандары діни басқармасының филиалы ретінде ресми діни қызмет атқарып отырған 2945 мешіт бар. Оның ішінде 1 республикалық, 3 мегаполистік, 17 облыстық, 472 қалалық, 164 аудандық және 2289 ауылдық мешіт халыққа тұрақты қызмет көрсетуде. 2025 жылдың басынан бері ел аумағында 61 жаңа мешіт ашылып, қазіргі таңда 214 мешіттің құрылысы жүргізілуде, сондай-ақ 545 намазхана үздіксіз жұмыс істеп тұр.
Жыл ішінде 382 мешітке күрделі жөндеу жұмыстары жүргізіліп, мешіт инфрақұрылымын жақсартуға айрықша көңіл бөлінді. Сонымен қатар, жыл басынан бері жеке тұлға атындағы 132 мешіт пен әртүрлі нысаналық мақсаттағы 137 жер телімі ҚМДБ меншігіне қабылданды. 25 мешіттің атауы ҚМДБ-ның Төралқа мәжілісінде қаралып, тиісті қолдау тапты. Құқықтық құжаттарды жүйелеу мақсатында 329 мешіттің Ереже құжаттары Әділет департаментіне жаңартылу үшін тапсырылды. Бұдан бөлек, діни қызметті тиімді әрі заңды негізде жүргізу үшін 741 дін қызметкеріне Бас мүфти атынан Бас сенім хат берілді.
