Сұрақ: Исламда тамақтану әдебі қандай?
Жауап: Исламда тазалық сақтау, әдептілік көрсету басты орында. Алланың адал еткенін жеу мұсылманға тән қасиет. Тамақтанудың басты сүннеттерінің бірі – «бисмиллә» деп тамақтану. «Бисмиллә» – «Алланың атымен» деген сөз. Алланың атын айтып жеуде үлкен хикмет бар.
Алланың берген несібесі деп танып, оған шүкіршілік білдіру саналы адамның ісі болуы керек. Бұл – мұсылманның мәдениеті мен әдебі. «Бисмиллә» деп тамақ жеу – аз сөз болғанымен, сауабы мен хикметі өте үлкен амалдардан.
Пайғамбарымыз (с.а.у.) хадисінде: «Алдымен «Бисмиллә» деп айт. Содан оң қолыңмен, өз алдыңнан же», деген, тағы бір хадисінде: «Кімде-кім тамақтанатын болса, алдымен «Бисмиллә» деп Алланың атын атасын. Егер ас-ауқат ішуден бұрын Алланың атын атауды ұмытып кетіп, аузына ас түскенде ғана есіне түссе, «Бисмилләһи әууәләһу уә әхираһу» (Астың алдында да, соңында да Алланың есімін айтамын) – деп айтсын» деген.
Икрам АЙТАЕВ
