Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы Ақтөбе облысына жасаған жұмыс сапары барысында облыстық орталық «Нұр Ғасыр» мешітінің жанынан ашылған Ақтөбе облыстық тарихи-өлкетану «Руханият» музейінің көрме залын аралады.
Сапар аясында Бас мүфти және делегация мүшелері өңірдің діни тарихынан сыр шертетін құнды деректермен, көне қолжазбалармен, тарихи мешіт-медреселердің мұрағаттық материалдарымен және ахун-ишандардың өмір жолын баяндайтын жәдігерлермен танысты.
Ақтөбе облыстық «Руханият» музейі – Исламның дінінің Қазақстан аумағына, соның ішінде Ақтөбе өңіріне таралу кезеңдерін және діннің ұлттық мәдениетке ықпалын жан-жақты таныстыратын республикадағы бірегей музей. Нысан 2011 жылдың 8 желтоқсанында, ҚР Тәуелсіздігінің 20 жылдығы қарсаңында ашылған.
Музейдің басты мақсаты – әлемдік және дәстүрлі діндер арасындағы татулық пен келісімді нығайтуға, өңір тұрғындарының мәдени және рухани дамуына үлес қосу. Сонымен қатар, музей ғылыми-ағартушылық бағытта жұмыс істеп, қоғамның тарихи-рухани санасын көтеруге қызмет етеді.
