Сұрақ: Әйел кісілердің намаз оқу үлгісі қандай?
Жауап: Намаз – балиғат жасына жеткен мұсылман адамға парыз. Ханафи мәзһабы ғалымдары және басқа да ғалымдар әйелдердің ерекшеліктеріне байланысты намаз рәсімдерінде еркек сияқты еркін емес, барынша жинақты болуының маңыздылығын атап өткен. Яғни, әйелдердің киімі ашылып қалмауы әрі басқа да жағдайлардан барынша намазда жинақы болуы қажет.
Пайғамбарымыздан (с.а.у.) келген хадистер негізінде намаз үлгісін ұсынған. Намазда әйел азаматшалар тәкбір алғанда қолдарын көкіректеріне дейін ғана көтереді. Қолдарын көкірек тұсына байлайды. Рукуғқа барарда арқасы мен тізесін сәл бүгіп, саусақтарының арасын ашпастан тізесіне қояды. Сәждеге барғанда білектерін жерге қойып, шынтақтарын қабырғасына жақын ұстап, ішін санына тигізеді. Тәшаһһуд отырысында екі аяғын бүгіп, оң жағына шығарып, бүйіріне қарай жантайып отырады.
Пайғамбармыз (с.а.у.) Уәйл ибн Хужр атты сахабасына былай деген: «Уа Хужурұлы! Намаз бастағанда екі қолыңды құлаққа дейін көтер. Ал, әйелдер кеуде тұсына көтерсін» деген.
Әйелдерге қатысты намаздың рәсімдері барысы жайлы басқа да хадистер келген. Негізі намаздың рәсімдерін орындауда әйелдердің нәзіктігіне, жаратылыс ерекшелігіне сай әрі жинақы күйде орындайды. Қоғамда ер азаматтары сияқты оқитын мәзһаб ұстанбайтын азаматшаларға еліктеуге болмайды. Қосымша намаз оқу үлгісін ҚМДБ-нің ресми сайттарынан алғанымыз абзал.
Икрам АЙТАЕВ
