Сұрақ: Намазда ракағат санынан шатасса, не істеу керек?
Жауап: Намаздың сыртқы және ішкі парыздары бар. Парыздарын сақтағанымыз абзал. Намазда адамға түрлі ойлар келуі қалыпты жағдай. Барынша олардан арылып, ықыласпен намазға берілу – қайырлы іс.
Егер реттілік саны бұзылып рәкәғаттар орындамағаны нақты есіне түссе, намазды қайта оқу абзал. Күмән болған жағдайда немесе шатасып қосымша рәкәғат оқып қойылса, сәһу сәждесі жасалады.
Сәһу сәждесін намазда жаңылысып намазды бір парызын кешіктірсе немесе артық істесе, яки бір уәжіпті ұмытып кетсе, намаздың соңында жасайды. Қосымша ҚМДБ-нің ресми сайттарынан ақпараттар алуға болады.
Пайғамбарымыздың (с.а.у.) хадисінде: «Кімде-кім намазда шүбәланса, дұрысы қайсысы екенін ойлап, намазын қанағаттанған ойына қарай толықтырсын. Сосын сәлем берсін де, қателік сәждесін жасасын, яғни жаңылғаны үшін екі сәжде жасасын» деген.
Ең қайырлы амалы – немқұрайлық танытпай, намазға шынайы, саналы түрде кірісу.
Икрам АЙТАЕВ
