Сұрақ: Исламда адамдармен қарым-қатынастың орны қандай?
Жауап: Ислам – әділдікке, адалдыққа, шындыққа негізделген дін. Адамдарды әлеуметтік топқа бөлмей сыйластық көрсету, мейірімді болу – діннің негізгі талабының бірі. Болмашы дүниеге бола ренжіп, қарым-қатынасты үзетіндер де кездеседі. Кейбір жат ағым өкілдері арасында да, адамды намазына басқа да амалдары негізінде бөліп, қарым-қатынастарын үзетіндер де бар. Мұндай түсінік дәстүрлі діннің тағылымына сай келмейді.
Құран аяттары мен хадистердің тағылымында адамдарды бір-біріне мейірімді болуға, қолдау көрсетуге және жақсы қарым-қатынаста болуға үйретеді. «Нахыл» сүресінің 90-аятында: «Негізінде, Алла әділетті, игілікті және ағайынға қарайласуды бұйырады» десе, пайғамбарымыздың (с.а.у.) хадисінде: «Мен сендерге намаз, ораза және садақадан да дәрежесі артық амалды айтайын ба?» – деп сұрағанда сахабалар «иә, айтыңыз» деді.
- Арадағы қарым-қатынастың дұрыс болуы. Өйткені, қарым-қатынастың бұзылуы жақсылықты жояды, – деген.
Адамдар арасында қарым-қатынасты дұрыстау сауапты амалдардан екен.
Икрам АЙТАЕВ
