21 шілдеде Астана қаласында Конфессияаралық және дінаралық диалогтың халықаралық орталығы Пәкістанның Исламабад қаласында орналасқан Халықаралық ислам университетінің Исламды зерттеу институтымен бірлесіп, «Ұрпақтар сұхбаты: рухани тәлімгерлік және жастар көшбасшылығы» тақырыбында халықаралық дөңгелек үстел ұйымдастырды.
Іс-шараның басты мақсаты – ұрпақаралық және конфессияаралық диалогты нығайту, жастар көшбасшылығын дамытудағы рухани тәлімгерліктің рөлін ілгерілету, сондай-ақ цифрлық ортаның сенімге әсерін талқылау болды.
Дөңгелек үстел аясында жаһандық бейбітшілікті нығайтудағы діннің рөлі, діни төзімділік және күш қолданудың алдын алу мәселелері қарастырылды. Осы тұрғыда конфессияаралық ынтымақтастықты тереңдету, сенім мен өзара құрметке негізделген халықаралық әріптестікті ілгерілетуге баса назар аударылды.
Іс-шара барысында Конфессияаралық және дінаралық диалогтың халықаралық орталығының Басқарма төрағасы м.а. Марат Қалижанов пен Халықаралық ислам университетінің Исламды зерттеу институтының Бас директоры, профессор, доктор Мұхаммад Зия-уль-Хак рухани тәлімгерліктің заманауи әлемдегі маңыздылығы жөнінде баяндама жасады.
Үш бөлімнен тұратын бағдарлама аясында қатысушылар дінаралық түсіністік пен ұрпақтар сабақтастығы мәселесінің өзектілігіне тоқталып, 2024 жылы өткен І Жас діни лидерлер форумының қорытындыларын саралады. Сонымен қатар, жастар арасында көшбасшылықты қалыптастырудың тиімді тетіктері талқыланды.
Дөңгелек үстел қорытындысында қатысушылар цифрлық технологиялар мен жасанды интеллектінің дін саласына тигізіп жатқан ықпалы жөнінде пікір алмасып, II Жас діни лидерлер форумына арналған ұсыныстарын білдірді.
Іс-шара гибридті форматта (онлайн/офлайн) өтіп, қазақ, орыс және ағылшын тілдерінде синхронды аудармамен қамтамасыз етілді.
