Әзербайжанда «Әр мешітке – кітапхана» атты жаңа жоба бастау алды. Оны Мемлекеттік діни бірлестіктермен жұмыс жөніндегі комитетке қарасты Рухани құндылықтарды насихаттау қоры жүзеге асыруда.
Жобаның басты мақсаты – жамағат арасында білім деңгейін арттыру, ұлттық-рухани және діни құндылықтарды насихаттау, сондай-ақ кітап оқу мәдениетін қалыптастыру. Ұйымдастырушылар жастарды гаджеттерден алыстатып, дінге қатысты шынайы ақпаратты халыққа қолжетімді етуге күш салмақ.
Жоба аясында 250 мешітке 25 000 кітап таратылып, арнайы сөрелер орнатылады. Кітаптар құрамында дін, тарих, әдебиет секілді түрлі салалар қамтылады. Сонымен қатар, олардың арасында ислам талаптарына сай келетін әзербайжан және әлем классиктерінің көркем шығармалары да болады.
Бұл бастама мешіттердің тек құлшылық орны ғана емес, сонымен қатар ағартушылық орталық ретінде де қызметін кеңейтуіне ықпал етеді.
