Сұрақ: Интернеттегі діни ақпараттарды қалай пайдалану керек?
Жауап: Facebook, Twitter, Bkонтакте, Whatsapp, Tiktok, Telegram, Threads, Instagram сияқты әлеуметтік желілерді пайдаланбайтын тұтынушылар бүгінде өте аз. Ғаламтор жүйесін ойлап тапқан ғалымдар, мұны адамдар бір-біріне зиянды ақпарат беріп отырсын немесе өз-өзіне қол жұмсауды үйренсін деп шығармағаны белгілі. Тек жақсылыққа ғана қолдану керектігін көзі ашық кез келген азамат білгені абзал.
Әлеуметтік желілерден мазмұнды, танымдық ақпараттарды пайдалану – заман талабы. Алайда, діни ақпараттарды пайдалану мен бөлісуде бірқатар ережелер мен жауапкершілікті ескерген жөн. Егер діни ақпараттарды сенімді, шынайы дереккөздерден алмаса, ресми діни басқармалар мен елдегі танымалды ғалымдарға жүгінбесе, қателікке ұрыну оп-оңай. Себебі сіз бөліскен немесе жолдаған видео, аудио т.б. материалдарда бұрмаланған немесе күмәнді ақпараттар адамдарды шатастырып, құрдымға апаратын материалдар болса, сондай-ақ, діни өшпенділік, діни алауыздық белгілері болса, әкімшілік немесе қылмыстық жауапкершілік қаралғанын ескерген жөн.
«Діни қызмет және діни бірлестіктер туралы» заңның талабында діни ақпараттарды бөлісу кезінде елдің тұрақтылығына қайшы келетін ақпараттарды пайдалануға жол берілмейді деген. Сондықдан діни материалдарды пайдалануда заң мен әдеп шеңберінен шақпау өте маңызды.
Икрам АЙТАЕВ
