Сұрақ: Дінде шектен шығудың салдары қандай?
Жауап: Дінде орта жолды ұстанған мұсылман адам фанатизмге бой алдырмайды. Интернет кеңістігіндегі діни ақпараттардың шегі жоқ. Отандық дәстүрлі дұрыс дереккөздерге немқұрайлық танытып, «таза исламды» насихаттайды деп шетелдік діни уағызшыларды дұрыс санап, қателікке бой алдырады. Тәжірибеде қателікке бой алдырғандардың психологиялық, әлеуметтік, мәдени т.б. себептері болады. Асыра діншілдікке мына санаттағы азаматтар кез болады:
-Адам өмірінде күйзеліске тап болып, рухани жауап пен мағына іздеп жалған уағызшыларға кез болуы;
-Адам эмоцияға беріліп, діндегі тепе-теңдікті сақтамай шектен тыс деңгейге бой алдыруы;
-Адам өз пікірінен бұрын беделді уағызшының сөзін ақиқат деп қабылдауы;
-Діннің өзін салыстырмалы түрде терең біліммен емес, біржақты уағыздар арқылы қалыптауы;
-Тәкаппарлыққа бой алдырып, өзін басқалардан тақуа санап, артық сезімге беріліп, асыра діншілдікке бой алдыруы.
Пайғамбарымыз (с.а.у.) хадисінде: «Уа адамдар! Дінде шектен шықпаңдар! Расында, сендерге дейінгілер дінде шектен шықандықтан құрдымға кетті» деген. Кез келген шектен шығушылықты дәстүрлі Ислам қолдамайды. Шынайы Ислам ақылдылықпен, парасаттылықпен өлшенетінін ұмытпағанымыз абзал!
Икрам АЙТАЕВ
