Сұрақ: Бір істе Аллаға тәуекел ету деген не?
Жауап: «Тәуекел» сөзі арқа сүйеу, бел байлау, үміттену, батылдық деген мағыналарды қамтиды. Яғни, адамның барлық бастамаларының нәтижелі, берекелі болуын Алладан тілеп, үміт арту.
Тәуекел ету – адам шамасы келген себептердің барлығын жасай отырып, істің нәтижесін Аллаға тапсыруы. Тәуекелділік белді бекем байлап, айқын іске бекем буыну.
Кейбір адамдар мақсатсыз, тәуекелсіз, жұмысқа ынталанбай оңай жолмен табыс табамын деп, келеңсіз жағдайларға кез болады. Соднай-ақ, «алма піс, ауызға түс» деп іс-әрекетсіз болу, амалсыз, бос үміт адамды азғындатады. Адам жақсы амалдарға тәуекел етіп, Аллаға сеніп істелген жұмыстар берекелі болады.
«Әл-Имран» сүресінің 159 аятында: «…Егер қандай да бір іске бел бусаң, бір Аллаға тәуекел ет. Шүбәсіз, Алла тәуекелшіл құлдарын жақсы көреді» десе, Пайғамбарымыз (с.а.у.) хадисінде: «Егер сендер Аллаға нық тәуекел етсеңдер, онда Ол сендерге таңертең қарындары қабысып шығып, кешке қампайып қайтатын құстарды ризықтандырған секілді ризық берер еді» деген.
Тәуекел етіп істелген амалдарымыз, нәтижелі де, берекелі болсын.
Икрам АЙТАЕВ
