Сұрақ: Баланы сүндеттеу міндет пе?
Жауап: Баланы сүндеттеу – пайғамбарымыз (с.а.у.) бұйырған амалдардан. Ол қазақ халқының рухани өмірінен орын алып, дәстүрге айналған. Кезінде сүндеттеуді молдалар атқарып келсе, қазір медицина қызметкерлері жүзеге асырады.
Сүндет амалы 3-7 жас аралығында баланың жыныс мүшесіндегі тері бөлшегін кесу арқылы жасалады. Сүндеттелмеген баланың жыныс мүшесінің басында инфекцияның пайда болу қаупі айтылып, сүндеттеуді медицина да қуаттап, пайдалы екенін алға тартқан. Дүниежүзiлiк денсаулық сақтау ұйымының өзi бұл рәсiмнiң адам денсаулығы үшiн жан-жақты маңызға ие екендiгiне келіскен.
Пайғамбармыздың (с.а.у.) хадисінде адам жаратылысының табиғи қажеттілігі ретінде мына бес нәрсені: сүндетке отыру, мұртты басу, қолтық пен ұятты жерді түктен таза ұстау, тырнақ алуды атаған. Тағы бір хадисте пайғамбарымыздың (с.а.у.) немерелері «Хасан мен Хусеин туылғаннан кейін жетінші күні оларды сүндетке отырғызды» деген.
Қазақ халқы баланы сүндеттегеннен кейін садақасын беріп, той жасап, қуанышы мен шүкіршілігін білдіреді.
Икрам АЙТАЕВ
