Патшаның уәзірі болған Низамул-Мүлк Бағдаттағы үлкен медресені аралап, жағдайларын біліп, шәкірттермен таныспақшы болады. Бір бөлмеде екі шәкірт сабақ қайталап отырғандарын көріп, біреуінен:
– Балам, сен не үшін оқып жатырсың? – деп сұрайды.
Ол: «Әкем қазы, мен де өскенде қазы болғым келеді. Сол үшін оқып жатырмын» деп жауап береді.
Екіншісіне де сол сұрақты қойса:
«Әкем мешіт имамы, мен өскенде соның орнына имам болу үшін оқып жатырмын» дейді.
Бұл жауаптарды естіп, көңілі түскен уәзір: «Біз сонда, осы медресеге қаржы бөліп, мынандай шәкірттер оқытып шығарсақ, болашағымыз бұлыңғыр болады екен ғой» деп ойлайды.
Медреседен шығып бара жатып, бір бөлмеде он екі жасар, болашақ ғұлама, имам әл-Ғазалиді көреді. Оған да осы сұрақты қойғанда, ол:
«Мағрифатолла (Алланы тану) үшін оқып жатырмын» деп жауап береді. Оның жауабына риза болған Низамул-Мүлк: «Осы шәкірттің ниеті үшін-ақ бұл медресені қаржыландыруға болады екен» депті.
Осы өмірде барлық нәрсе – шынайы ниетке байланысты.
Алла баршамызға ықыласты ниет, пайдалы ілім, қабыл болатын амал, көркем мінез нәсіп етсін!
Қуат ҚАБДОЛДА
