ХІІ ғасырлық тарихы бар Ақбикеш мұнарасының бір бөлігі қирап қалды.
Созақ ауданында орналасқан Ақбикеш мұнарасы ХІІ-ХІІІ ғасырларда тұрғызылған. Орта ғасыр ескерткіші биік қыр басында, жел өтінде тұрғанына 6 ғасырдан астам уақыт болған. Дегенмен, жаңбыр мен қар суына шыдас бермеген тарихи нысанның бір бөлігі опырылып қалды.
Бұл жайында әлеуметтік желіде арнайы жазба жариялаған қоғам белсендісі Жылбек Керімбек «қолда бар тарихи ескерткіштен айырылдық» деп дабыл қақты.
— Кезінде дабыл қақтық, сөзімізге ешкім құлақ аспады. Жауын-шашын тимеу үшін төбесіне шатыр жабу керек дедік. Олай істемеді, жауған жаңбыр, қар суы ескерткіштің дуал-қабырғасына кеулеп кіріп, ақыры құлатты. Бұдан бұрын да құлаған. Әр құлаған сайын ішкі өз сылағы мен қышты алып түседі. Түркістан облысы, Созақ ауданы, Ақсүмбе ауылындағы «Ақбикеш» мұнарасына жөндеу жұмыстарын «Қазқайтажаңарту» РМК РГП Казреставрация мекемесі жасаған, – делінген автордың жазбасында.
Ал, Қазақстан Республикасының Мәдениет қайраткері Төреғали Ташенов «мұнара жөндеусіз тұра бергенде 100 жылға шыдас берер ме еді?» деген пікірімен бөлісті.
— Төбесін ашық қалдырғандықтан, жауған қар мен сорғалаған жаңбыр қоя ма, ақыры мынау болды. Сыртқы дуалы жермен-жексен құлағанда ішіндегі 6 ғасырға шыдас берген ғажайып ескерткішті, мемлекет қорғауындағы тарихи мұнараны өзімен бірге қоса жұлып алып кетті. Сұмдық. Сол бойы жөндеусіз-ақ тұра бергенде, әлі де 100 жылға шыдас берер ме еді?», – деді Төреғали Ташенов.
Мәселенің мән-жайын түсіндірмек болған Созақ ауданының әкімдігі тарихи жәдігердің қазіргі жағдайы туралы облыстық мәдениет басқармасына шұғыл хат жолданғанын жеткізді.
— «Ақбикеш» мұнарасы ҚР Мәдениет және спорт министрлігінің республикалық дәрежедегі ескерткіштер тізіміне енгізілген. «Ақбикеш» мұнарасына 2020 жылы «Қазреставрация» ғылыми зерттеу және жобалау мемлекеттік мекемесінің Қызылорда филиалы тарапынан қалпына келтіру жұмыстары жүргізілді. Тапсырыс беруші — Қазақстан Республикасы мәдениет және ақпарат министрлігі. 2025 жылдың 25-26 қаңтарда ауа райының қолайсыздығына байланысты қар мен жаңбырдың салдарынан мұнараның бір шеті тағы құлаған. Тарихи жәдігердің қазіргі жағдайы туралы дер кезінде аудан әкімі тарапынан облыстық мәдениет басқармасына шұғыл хат жолданған», – делінген әкімдік ақпаратында.
