Ислам – монотеистік діндерге жататын әлемдік діндердің бірі. Оны мойындайтын адамдардың саны бойынша ол әлемде екінші орында тұр. Мұсылмандардың көпшілігі Азия мен Африканың солтүстігінде тұрады. Исламның тармақтарының ішінде ең үлкені – сүннизм мен шиизм.
Ислам дініндегі діндар адам бейнесі – бұл Алланың әмірлерін орындап, пайғамбарымыз Мұхаммедтің (с.ғ.с.) сүннетін ұстанып, өмірін рухани тұрғыда түзетуге тырысатын адам. Мұндай адам өз іс-әрекеттерінде, сөздерінде, ойларында да Исламның құндылықтарына сәйкес әрекет етеді. Діндар адамның негізгі сипаттамалары: Аллаға деген сенім, ислам дінінде сенімнің негізі – Алланың бар екеніне және Оның бірлігіне. Діндар адам өмірінің әр сәтінде Алланың әмірлері мен тыйымдарын орындауға тырысады.
Ислам діні адамның ішкі жан-дүниесін тәрбиелеуді, мінез-құлқын түзетуді және қоғамға игілік әкелуді мақсат етеді. Діндар адам бейнесі Құран аяттарында және Пайғамбар Мұхаммедтің (с.ғ.с.) хадистерінде нақты сипатталған. Ол адамды тек діндарлық тұрғысынан емес, сонымен қатар рухани, қоғамдық және адами құндылықтар тұрғысынан толыққанды тұлға ретінде қалыптастыруға бағытталған.
Діндар адамның жүрегі Аллаға деген сенімге толы. Ол әрдайым Алланы еске алып, тағдырға разы болып, құлшылық етуді басты міндеті санайды. Намаз оқу, ораза ұстау, садақа беру және қажылық сияқты парыздарды орындау – рухани діндарлықтың айқын көрінісі.
Мұсылманның ең басты мінез ерекшелігі – көркем мінез. Пайғамбарымыз (с.ғ.с.): “Нағыз мұсылман – өзгелерге тілімен де, қолымен де зиян тигізбейтін адам” деп, діндарлықтың адамгершілік қасиеттермен тығыз байланысын көрсеткен. Ең жақсы амал – адамдарға пайдалы болу. Діндарлықтың белгісі – адалдық пен уәдеге берік болу.
Діндар адам өтірік айтпайды, ғайбат сөз сөйлемейді, адамдарға әділетсіздік жасамайды және сабырлы болады. Исламда діндар адамның қоғамға деген жауапкершілігі ерекше орын алады. Ол туыстармен жақсы қарым-қатынас жасап, мұқтаждарға көмек көрсетеді, жетімдерге қамқор болып, әділдік пен ынтымақты сақтауға тырысады. Исламда білім алу – әр мұсылманға парыз. Діндар адам тек діни іліммен шектелмей, дүние, білімге де көңіл бөліп, қоғамға пайда әкелуге ұмтылады. Діндар адамның ең айқын сипаты – қарапайымдылық. Ол ешқашан менменсімей, өзін басқалардан жоғары қоймайды. Сабырлылық барлық қиындықтарды жеңіп, Алланың сынақтарына төзімді болуға көмектеседі.
Қорыта айтқанда, исламдағы діндар адам – рухани тазалықты, көркем мінезді және қоғамға пайдалы болуды өзіне мақсат еткен жан. Ол тек өзінің емес, айналасындағы адамдардың да өмірін жақсартуға атсалысады.
Исламдағы діндар адам – бұл өзімен, айналасымен және Алламен үйлесімді өмір сүретін жан. Оның мақсаты тек жеке құлшылықта емес, сонымен бірге қоғамға пайдалы іс-әрекеттер жасап, әлемді жақсылыққа толтыру. Діндарлық – адамның сыртқы көрінісімен емес, ішкі рухани жан-дүниесімен өлшенеді.
Қызғалдақ ҚАЗИ,
Қызылорда облысы дін істері басқармасы
«Дін мәселелерін зерттеу орталығы»
КММ-нің маманы
