Жақында өзге дін өкілінің қалай мұсылман болғаны жөнінде бір материал оқыған едім. Әңгімеде ол кісі;
«Мен Құранды зерттеп, оның Алла Тағала тарапынан түспегенін, яғни хақ кітап емес екенін дәлелдеп жазуға тапсырма алған болатынмын. Сегіз жыл бойы күндіз-түні зерттей отырып, оқи бастадым. Әрбір сүренің және оның аяттарын оқыған сайын, өз дінімнен алыстап бара жатқанымды іштей түсіндім. Құранның соңғы сүрелерінің бірі «Мәсәд» сүресіне келгенімде, бағытым, ойым, санам мүлдем басқа арнаға бұрылды.
Сүре Мұхаммед Пайғамбардың (с.ғ.с.) қаскөй дұшпаны Әбу Ләһәбтың құрдымға кетуі жайлы болатын. Ол Алла Елшісінің соңына түсіп, насихатына килігіп, адамдарды иманнан қайтармақ боп тырысқан екен. Сүре ақыретте оған лаулап жанған отқа оранатындығын және Әбу Ләһәбтің әйелі де азапталатындығы, оның мойнына отты арқан салынып, тозаққа сүйретілетіндігі баяндалған.
Ал енді сүренің түсу уақытына тоқталайық. «Мәсәд» сүресі – Меккелік сүре. Иә, сол уақыттары Әбу Ләһаб әйелімен бірге мұсылмандарға көп зұлымдық жасаған екен. Бір қызығы Әбу Ләһаб осы сүре түскеннен кейін тура 10 жылдан соң қайтыс болған. Ол он жыл ішінде иман етуі мүмкін едіғой. Себебі онымен бірге болған көптеген мүшріктер иман еткен болатын. Бірақ Әбу Ләһаб әйелімен бірге иман етпеді.
Сонда өз-өзіме «Бұл кітапты, яғни Құран Кәрімді Мұхаммед пайғамбар өзі жазған болса, онда Әбу Ләһаб және оның әйелінің мүлдем иман етпейтінін қайдан білді?, деген ойыма сұрақ келді. Екіншіден, егер Әбу Ләһаб сол сүре түскеннен кейін иман келтірген болса ше?. Онда біз бұл кітапты міндетті түрде өтірік деп айтар едік.
Осы бір ғана сүренің өзі құдіреті шексіз, мәңгі тірі және барлық нәрсені толық білуші Жаратушы Алла тарапынан жіберілген кітап екеніне дәлел емес пе?!.
Зеттеу нәтижесінде Аллаға және Оның жіберген ақырғы пайғамбарына иман етіп, мұсылман болуға шешім қабылдадым» – дейді мұсылман бауырымыз.
Расында, Алла Тағала Құран Кәрімнің «Зүмəр» сүресінің 36-37 аяттарарында «…Кімді Алла адастырса, оған тура жол көрсетуші жоқ. Ал кімді Алла тура жолға салса, оны адастырушы жоқ…» деп ескертеді.
Дайындаған – Тұрар ТҮГЕЛҰЛЫ
