Сұрақ: Өзін пайғамбармын деп жүргендер кімдер?
Жауап: Иман шарттарының бірі – пайғамбарларға сену. Пайғамбар сөзіне жанама елші, нәби, расул сөздері пайдаланады. Құран Кәрімде қиссаларымен жиырма бес пайғамбардың аты аталған.
Алла Тағала жаратылыстардың ішіндегі ең ұлығы – адамдарға тура жолды үйрету, олардың ақиқатқа жетуі, халал мен харамды айыра білуі т.б. үшін пайғамбарларына парақтар мен кітаптарын түсірген. Бұрынғы пайғамбарлар белгілі бір қауымға жіберілсе, Мұхаммед (с.а.у.) пайғамбар (Ислам діні) бүкіл адамзатқа және қияметке дейін келген.
Ал, еліміздің өңірлерінде немесе шетелдерде өзін пайғамбарымын деп ұрандатып жүргендердің іс-әрекеттері діни негізге жатпайды. Ондай санаттағы адамдардың діни танымы дұрыс қалыптаспаған. Дәстүрлі Исламда Мұхаммед (с.а.у.) соңғы пайғамбар екені белгілі. «Ахзаб» сүресінің 40-аятында: «Мұхаммед араларыңдағы бірде-бір еркек кіндіктінің әкесі емес. Ол, Алланың елшісі һәм ең соңғы пайғамбар. Алла барлық нәрсені білуші» деген.
Алла Құран аяты арқылы Мұхаммед (с.а.у.) соңғы пайғамбар екендігі және ешқандай пайғамбар келмейтіндігін білдіріп отыр. Демек, өзін пайғамбармын деп жариялау Ислам дініне жат ұғым.
Икрам АЙТАЕВ
