Сұрақ: Тағдырға разы болу деген не?
Жауап: Тағдырға сену – иман шарттарының бірі. Яғни, Алла Тағала барлық нәрсені толық біліп, белгілі бір өлшеммен белгіленгеніне сену. Барлығы Алланың қалауымен және ілімімен жүзеге асады.
Тағдырдағы өзгермейтін факторлар – туатын жері, ата-анасы, жынысы, сыртқы келбеті және табиғи апаттар немесе бақылаудан тыс оқиғалар. Сондай-ақ, тағдырда адамға таңдау жасау еркі мен жауапкершілігі де берілген. Сонымен адам өз іс-әрекеті үшін жауапты болады. Жақсылығы үшін сауап алып, Алланың разылығына бөленеді. Ал, нәпсіге ерік берсе, күнә арқалап, Алланың разылығына бөленбейді.
Пайғамбарымыз (с.а.у.) хадисінде: «Мүмін адамның жағдайына таң қаласың! Шындығында оның кез келген ісінде жақсылық бар, әрі бұл мүміннен басқа ешкімге берілмеген. Егер оған бір жақсылық келсе, ол Аллаға шүкіршілік айтады және оның сол айтқанында жақсылық бар, ал егер оған бір қайғы келсе, ол оған сабыр етеді, оның бұл ісі де өзіне жақсылық болып оралады», деген.
Сондықтан адамның басына қуанышты жағдайлар мен бірге қайғының да қатарласып келетіні белгілі. Алайда адамның басына сынақ келген жағдайда оған сабыр етіп, өзін ұстаумен қатар разылық таныта білгені қайырлы және дұрыс. Әрбір қиындықты нақты мынау осы себептен болды деп кесіп айту дұрыс емес. Оның нақты хикметін Алла біледі.
Икрам АЙТАЕВ
