Сұрақ: Мемлекет пен діннің қызметі қандай?
Жауап: Қазақстан Республикасы – зайырлы мемлекет. Ел аумағында түрлі этнос өкілдері мен дін өкілдері бейбі өмір сүруде. Қазақстан Республикасында мемлекет пен діннің арақатынасы заңмен нақты ажыратылған.
Әлемде әр мемлекеттің дін саласындағы өзіндік саясаты әртүрлі. Бір мемлекеттер бірнеше діннің теңдігін мойындаған болса, өзгелері бір діннің үстемдігін қабылдап, басқа діндерге құрмет көрсетеді.
Елімізде мемлекет пен діннің қоғамдағы атқаратын қызметтері мен міндеттері бір-бірін толықтырып, әрқайсысы өзіне тән бағытта жұмыс істейді. Мемлекет – барлық азаматтардың құқықтары мен бостандықтарын тең қорғайды, халықтың тұрмысының жақсаруына жағдай жасап, білім, денсаулық сақтау және инфрақұрылымды дамытады, ел ішіндегі ұлтаралық және конфессияаралық татулықты сақтайды, мемлекеттік басқару мен діннің қызметін бөлек ұстап, барлық діни бірлестіктердің заң алдында теңдігін қадағалайды.
Дін – қоғамның рухани-адамгершілік өмірінің маңызды саласы екендігі белгілі. Дін мейірімділік, татулық, адалдық және кішіпейілділік қасиеттерін қалыптастырады, адамдарды ортақ құндылықтар мен сенім төңірегінде топтастырып, қоғамдағы тұтастықты сақтауға ықпал етеді, ұлттық салт-дәстүрлер мен салт-сананың сақталуына, өркениеттің дамуына үлес қосады. Зайырлы мемлекетте әр азаматтың ар-ождан мен діни сенім бостандығы қорғалады.
Икрам АЙТАЕВ
