Иран қолдайтын Йемендегі «Ансарулла» қозғалысының (хуситтер) белгілі өкілдерінің бірі Фирак Мухсин әл-Ассар елдің оңтүстік-батысындағы Баб әл-Мандеб бұғазы маңында алты күзетімен бірге қаза тапты.
Бұл туралы Йемен ақпарат министрінің орынбасары Абдулбасит әл-Кайди америкалық X әлеуметтік желісінде хабарлады.
Кайди әл-Ассардың қалай қаза болғаны туралы нақты мәлімет келтірмеді. Оның айтуынша, оқиға стратегиялық маңызы зор Баб әл-Мандеб бұғазына жақын орналасқан Кахбуб майданында болған.
Үкімет бақылауындағы «Амалика» күштерінің медиа орталығының директоры Асиль әс-Саклади де X желісінде әл-Ассардың қаза болғанын растады.
«Ассар өзін генерал-майор деп атаған. Ол кеше Кахбуб майданында қаза тапты», – деп жазды ол.
Сакладидің айтуынша, әл-Ассар Йеменнің орталық бөлігіндегі Ибб провинциясындағы хуситтердің ықпалды өкілдерінің бірі болған және бұған дейін қозғалыс қатарындағы адамдарды жасақтауға жетекшілік еткен.
Хуситтер әзірге бұл ақпаратқа түсініктеме берген жоқ. Алайда қозғалысқа жақын белсенділер әл-Ассардың қаза болғанын хабарлап, оны «жиһадшы қолбасшы» деп атады. Олардың мәліметінше, ол «Мұғавир» бірінші бригадасын басқарған және генерал-майор шеніне ие болған. Белсенділер оның өлімінің мән-жайын нақтыламады.
Жергілікті БАҚ-тың хабарлауынша, соңғы күндері Баб әл-Мандеб бұғазына үстемдік ететін таулы аумақтарды қамтитын Кахбуб майданында үкімет күштері мен хуситтер арасында ауыр қақтығыстар болған.
