Сұрақ: Ислам діні зұлымдыққа жол аша ма?
Жауап: Ислам дінін зұлымдыққа, қатыкездікке негізделген дін деп пайымдау дұрыс түсінік емес. Исламның тағылымында әділеттілік, мейірімділік, адамға жақсылық жасау және зұлымдықтан тыйылу маңызды орын алады.
Ал, Ислам дінін ұстанамын деген адамның надандықпен істеген зұлымдығын, ислам діні себеп болды деп айту үлкен қателік. Сондай-ақ, Ислам атын жамылып, радикалды діни топтар зорлық-зомбылық, соғыс, кемсітушілік сияқты іс-әрекеттерін ақтағысы келеді. Мұндай радикалды іс-әрекеттерін мұсылман қауымына немесе Исламның өзіне теңеу дұрыс емес.
Радикалды діни топтар Құран аяттары мен хадистердің мазмұнына терең үңілмей, сөзбе-сөз пайымдап, қоғамда діни алауыздық қоздырып адасушылыққа бой алдырады. Дәстүрлі дінімізге берік болып, діни ағымдарға еліктемеу керек.
«Юнус» сүресінің 44-аятында: «Расында, Алла адамдарға еш зұлымдық жасамайды. Бірақ, адамдар өздеріне-өздері зұлымдық жасайды», десе, Пайғамбарымыздың (с.а.у.) хадисінде: «Мұсылман – өзге мұсылмандар оның тілі мен қолынан зиян шекпеген адам», деген.
Зұлымдықтың атауы дәстүрлі Исламға жат әрекет. Оны жасау мұсылман адамның сипаттарынан емес екен.
Икрам АЙТАЕВ
