Сұрақ: Исламда жала жабу туралы не айтылған?
Жауап: Жала – адамның сыртынан ар-намысы мен қадір-қасиетіне нұқсан келтіретін, атақ-абыройын түсіретін жалған мәлімет. Ол дінімізде үлкен күнәлар санатына жатады. Дәстүрімізбен де мүлде ұштаспайтын жағымсыз дүние.
Жаланы кәсіп еткен адам жалақор болады. Ол өтірік пен дәлелсіз сөз таратып, біреуге жала жабатын адам. Ислам тағылымы адам бойындағы жағымсыз қасиеттер мен іс-әрекеттерден аулақ болуға шақырады. Жағымсыз қасиеттерге ие болудың салдары берекесіздікке соқтырады.
Пайғамбарымыз (с.а.у.) хадисінде: «Ғайбаттың не екенін білесіңдер ме?», деп сұрайды. Олар: «Оны Алла мен елшісі жақсырақ біледі», деп жауап қатады. Пайғамбар: «Ғайбат деген – бауырыңды оның ұнатпайтын нәрсесімен еске алуың», дейді. Сонда біреу: «Егер айтып жатқаным бауырымның бойынан табылса ше?», деп сұрақ қояды. Пайғамбар: «Егер айтқаның оның бойынан табылса, ғайбаттадың. Ал егер бойында болмаса, онда жала жапқаның», деген.
Демек, жаламен айналысып берекетсіздікке ұшырағаннан, жақсылық жасап Алланың ризалығына бөлену қайырлы іс екен.
Икрам АЙТАЕВ
