Сұрақ: Орынсыз сөз сөйлеудің салдары қандай?
Жауап: Ислам – барлық мәселеге шешім тапқан кемел дін. Ол пайдасы жоқ, орынсыз, әдепсіз сөйлеуден қайтарған. Ауыздан шыққан сөздің салмағы бар. Өтірік айту, ғайбаттау, өсек тарату, балағаттау, боқауыз сөздер айту, кекету, мазақ ету, біреудің көңілін жаралайтын т.б. сөздер пайдасыз сөздерге жатады. Олар салмағына қарай харам, мәкруһ болып күнәға апарады.
Қазақтың салт-дәстүрі мен Ислам әдебі сөйлер алдында ойлануға, пайдасы жоқ сөзден тыйылуға, жұмсақ сыпайы сөйлеуге, ашумен сөйлеп қоймауға бұйырады. Себебі әр қолданған жақсы сөздің хикметі бар.
Пайғамбарымыз (с.а.у.) хадисінде: «Расында, мен үшін ең сүйіктілерің, әрі қиямет күні маған ең жақын болатындарың – мінез-құлқы ең көркем болғандар. Сондай-ақ, мен үшін ең жек көрініштілерің, әрі қиямет күні менен ең алыс болатындарың – көп сөйлейтін мылжыңдар, ділмәрсіп аузын көпіртіп сөйлейтін лепірме мақтаншақтар және басынан сөз асырмайтын тәкаппар сөзшеңдер», деген.
Демек, жақсы сөз айтып, жақсылыққа жете берейік.
Икрам АЙТАЕВ
