Сұрақ: Исламда көп сөйлеу туралы не айтылған?
Жауап: Исламда көп сөйлеу әдептілікке жатпайды. Сөйлеу қабілеті – Алланың адамға берген нығметінің бірі. Оны дұрыс мақсатта пайдалану – саналы адамның ісі. Дұрыс айтылған сөз адамның беделін арттырса, орынсыз, ойланбай айтылған сөз адамның беделі мен абыройын төмендетіп жіберуі мүмкін.
Исламда орнымен дұрыс сөз сөйлеу – құпталған дұрыс амалдардан. Ал, мән-мазмұны жоқ пайдасыз шамадан тыс сөздердің салдары ғайбат айтуға, өсек айтуға, біреудің арына тиюге, мазақтауға, келемеждеуге, кемсітуге апаруы мүмкін. Нәтижесінде мұндай әрекеттер күнәға соқтырады. Себебі «Адамға келетін он пәленің тоғызы – тілден», деген.
«Ахзаб» сүресінің 70-аятында: «Уа, иман келтіргендер! Алладан қорқыңдар және дұрыс сөйлеңдер», десе, Пайғамбарымыздың (с.а.у.) хадисінде: «Пенденің жүрегі түзелмейінше иманы дұрыс болмайды, ал оның тілі дұрыс болмайынша жүрегі де түзелмейді», деген.
Демек, жақсы сөз – жақсы жүректің жемісі екен. Жақсы сөз айтып, Алланың ризалығына бөленіп, сауапты амалдарымызды арттыра берейік.
Икрам АЙТАЕВ
