Сұрақ: Исламда жақсы сөздің маңызы туралы не айтылған?
Жауап: Тіл – сүйексіз болғанымен, адамның ең көп қызмет істейтін мүшесі. Ол адамның ойлаған ниетін білдіретін ағза. Егер адам оны жақсылыққа қолданса, абырой тауып, сауапқа бөленеді. Жамандыққа пайдаланса, абыройдан айырылып, ұятқа қалады.
Қазақ халқы көп сөзді адамды «мылжың», «бәдік», «көкезу», т.б. деп атаған. Әдетте «Басқа бәле – тілден» дегендей, көп дау-жанжал, талас-тартыс тілге ие болмағаннан туындайды. Бала кезден ақылдылық пен парасаттылықты дұрыс қалыптастырсақ, бала болашаққа нық қадам басып, қоғамда өз орнын табады.
Исламда тілдің апаты жайлы көптеген хадис бар. Пайғамбармыз (с.а.у.): «Кім Аллаға және ақырет күніне иман келтірсе, жақсы сөз айтсын немесе үндемесін» деп, орынды сөз бен орынсыз сөзге аса қатты мән берген.
Тағы бір хадисінде: «Адам баласының көптеген қателігі – тілдің кесірінен» деген.
Әрбір айтылатын сөздің мазмұнына, салмағына, мән бергеніміз – қайырлы іс.
Икрам АЙТАЕВ
