Сұрақ: Исламда пікір айту әдебі бар ма?
Жауап: Ислам діні орнымен пікір айтуды шектемейді. Бірақ пікір айтудың белгілі бір әдебі мен өлшемдері бар екенін ұмытпағанымыз жөн. Сонымен қатар адамның пікірі шындыққа, әділдікке және көркем мінезге негізделгені абзал.
Дәстүрлі Исламның тағылымы әртүрлі көзқарастарға құрметпен қарауға, діни сенім мен ар-ождан бостандығын құрметтеуге, өзара татулық пен сыйластыққа, қоғамдық және ортақ мәселелерді ақылдасып шешуге, эмоцияға бой алдырмауға шақырады. Ал, дін негіздерін білмей «сен күнәһарсың», «сен адасудасын», «біздікі ақиқат» деген ұстанымнан алыс болғанымыз дұрыс. Себебі жат дін өкілдері діннен хабары болсын, болмасын діни үкімдермен пікір айта береді. Айтылған пікірлері дінараздық алауыздыққа себеп болып жатады.
Негізі пікірлер ғылымға, қисынға, ақылға негізделген болса, оларды да құптауға болады. Діни көзқарастар өзара пікір алмасуда талас-тартысқа, дінараздық жанжалға алып барып, қоғамның діни тұрақтылығына нұқсан келтірмеуі керек. Пікір айтамын деп діни пәтуа беруден сақ болған дұрыс.
Ал, діни тұрғыдан үкім айтуда Құраннан, сүннеттен, араб тілінен, фиқһтан, салт-дәстүрден т.б. әдіснамасы сияқты салаларда терең білімі бар ғалымдар болуы керек. Елімізде діни пәтуа беру мәселесінде ҚМДБ-ның пәтуа бөлімі айланысады. Демек, Исламда кез келген адамның негізсіз діни үкім айтуы құпталмайтын іс екен.
Икрам АЙТАЕВ
