Иран қолдайтын Йемендегі «Ансарулла» қозғалысы (хуситтер) Йеменнің оңтүстік-батысындағы Моха қаласы мен елдің орталық бөлігіндегі Мариб провинциясында орналасқан әскери нысандарға баллистикалық зымырандар мен ұшқышсыз ұшу аппараттары арқылы соққы жасаған.
Бұл туралы хуситтердің бақылауындағы SABA агенттігі жариялаған қозғалыстың әскери өкілі Яхья Саридің мәлімдемесінде айтылған. Саридің сөзінше, шабуыл барысында көптеген баллистикалық зымырандар мен дрондар қолданылған. Ол соққы жасалған нысандардың «Сауд Арабиясына тиесілі болғанын» мәлімдеді.
Сари сондай-ақ зымырандар мен дрондар «көзделген нысандарға дәл тигенін», соның салдарынан «ондаған адамның қаза тауып, жараланғанын», олардың арасында Сауд Арабиясының азаматтары да бар екенін айтты.
Сауд Арабиясы әзірге хуситтердің бұл мәлімдемесіне қатысты түсініктеме берген жоқ. Эр-Рияд билігі Йеменде әскери күштері жоқ екенін, олардың рөлі халықаралық деңгейде мойындалған Йемен үкіметіне бағынышты күштерді қолдаумен және өз шекараларының қауіпсіздігін қамтамасыз етумен ғана шектелетінін мәлімдеп келеді.
Соңғы күндері Йеменнің түрлі аудандарында хуситтер мен үкіметтік күштер арасында қақтығыстар болып жатыр.
Иран қолдайтын хуситтер 2014 жылдан бері Йемен аумағының бір бөлігін, соның ішінде ел астанасы Сананы бақылауында ұстап отыр. Ал Сауд Арабиясы бастаған коалиция 2015 жылдан бері Йемен үкіметіне қолдау көрсетіп келеді.
