Мемлекет басшысы Қасым-Жомарт Тоқаев еліміздің транзиттік әлеуетін арттырып, Азия мен Еуропа арасын жалғайтын көпір ретіндегі рөлін күшейтуге айрықша мән беріп келеді. Осы орайда жуырда ғана Ресейдің Омбы қаласында өткен ХХІІ Қазақстан-Ресей өңіраралық ынтымақтастық форумында аталған саланың дамуына сеп болар маңызды мәселелер талқыланды.
Осы жиын барысында біз Ресей Федерациясының сенаторы Борис Хачировпен тілдесіп, Қазақстан мен Ресей арасындағы қарым-қатынастар жайында пікірін білген едік. Айта кетсек, Б.Хачиров – Қалмақ Республикасынан сайланған сенатор. Ол өз сөзінде Каспий теңізі арқылы шектесіп жатқан көршілер ретінде Қазақстан мен Қалмақ Республикасының, сондай-ақ ежелден аралас-құралас өмір сүріп келе жатқан қазақ пен қалмақ халықтарының ұқсастықтары көп екенін тілге тиек етті.
«Бұл форум аясында Атырау облысының әкімі Болат Оралұлымен кездесу өткіздік. Атырау облысы мен Қалмақияның ұқсас тұстары көп. Каспий теңізінің жағасын ен жайлаған екі өңірдің экономикасы, климаты мен басқа да ерекшеліктері бір-біріне жақын. Бүгінде екі тарап арасында қолға алынып, одан әрі дамытуды қажет ететін бірқатар маңызды міндет бар. Олардың қатарында Солтүстік-Оңтүстік көлік дәлізін дамыту, климаттық мәселелерді бірлесіп шешу, мәдени байланыстарды нығайту және өзге де мәселелер күн тәртібінде тұр. Мәселен, Қалмақияда қазақ киносы мен әзіл-сықағы өте танымал. Атырау облысының әкімімен кездесу барысында қазақтың кино және өнер жұлдыздарын республикамызға шақырып, Қазақ мәдениеті күндерін өткізу туралы уағдаластық», деді ол өз сөзінде.
Б.Хачиров осыдан жарты жыл бұрын Қалмақ Республикасына «Астана» көңілді тапқырлар командасы келіп, жергілікті көрерменге үлкен шоу ұсынып қайтқанын, қазақ пен қалмақ халықтарының менталитеті бір-біріне жақын болғандықтан, қазақтың әзіл-сықағы оларға ерекше ұнайтынын да жеткізді.
«Бұдан бөлек, Ресей мен Қазақстан парламенттері арасындағы байланысты да одан әрі нығайта беруіміз қажет. Биыл сіздердің елдеріңізде кең көлемді саяси реформалар қолға алынып, наурыз айында бүкілхалықтық референдум арқылы жаңа Конституция қабылданғанын білеміз. Одан кейін бұрынғы екі палаталы Парламент таратылды. Алдағы уақытта жаңадан құрылатын бір палаталы Құрылтаймен байланысымызды бұрынғыдан да тереңдете береміз деген сенімдемін», деді ол.
Ресейлік сенатор Омбы қаласында өткен ХХІІ Өңіраралық ынтымақтастық форумының мақсаты – бір жерде бас қосып, жүздесіп қайту ғана емес, болашаққа бағытталған ортақ идеяларды ортаға салып, бірлескен жобаларды қолға алу екенін жеткізді.
«Мен Қазақстан мен Ресейдің ынтымақтастығына, соның ішінде қазақ пен қалмақ халықтарының арасындағы қарым-қатынасқа әрдайым айрықша көңіл бөліп келемін. Алдағы уақытта да осы байланыстарды одан әрі дамытуға өз үлесімді қосуға барынша күш саламын», деді ол.
Ескендір ЗҰЛҚАРНАЙ
