Израильдің Сирияның Идлиб провинциясындағы қараусыз қалған Абу-Духур әскери аэродромына жасаған әуе шабуылы бірқатар елдер мен халықаралық ұйымдардың қатаң реакциясын туғызды.
Израиль әскери-әуе күштері аэродромға 8 рет әуе соққысын жасап, ұшу-қону жолағы мен ангардағы қараусыз қалған нысанды зақымдаған. Қаза тапқандар мен зардап шеккендер туралы ақпарат түскен жоқ.
Сирия Сыртқы істер министрлігі шабуылды айыптап, оны елдің егемендігі мен аумақтық тұтастығын ашық түрде бұзу деп бағалады. Дамаск Израильдің Сирия үкіметінің шиеленісті бәсеңдетуге бағытталған күш-жігеріне қарамастан, 2024 жылғы 8 желтоқсаннан бері Сирия аумағына соққы жасауды жалғастырып келе жатқанын атап өтті.
Түркия Сыртқы істер министрлігі Израильдің шабуылдарын қатаң айыптады. Анкара Израильдің Сирияның инфрақұрылымы мен қорғаныс әлеуетіне қарсы ойланбастан соққы беріп, елдің аумақтық тұтастығын бұзып отырғанын мәлімдеді. Түркия халықаралық қауымдастықты бұған қатысты неғұрлым батыл ұстаным танытып, халықаралық құқық бұзушылықтары үшін жауапкершілікті қамтамасыз етуге шақырды.
Иордания Сыртқы істер министрлігі шабуылды негізсіз агрессия және Сирияның егемендігі мен аумақтық тұтастығын бұзу деп атады. Амман Израильді елдің қауіпсіздігі мен тұрақтылығына қауіп төндіретін шабуылдарды тоқтатуға шақырды.
Катар Сыртқы істер министрлігі әуе соққысын Сирияның егемендігін, халықаралық құқықты және БҰҰ Жарғысын ашық бұзу деп бағалады. Доха Израильдің аймақтағы мемлекеттердің егемендігін жазасыз түрде бұзуына жол беруге болмайтынын ескертті.
Кувейт Сыртқы істер министрлігінің мәлімдеуінше, шабуыл Сирияның егемендігі мен аумақтық тұтастығын бұзып, өңірлік қауіпсіздікке нұқсан келтіреді. Кувейт халықаралық қауымдастықты Израильдің Сирияға жасаған соққыларын тоқтатуға күш салуға шақырды.
Сауд Арабиясы Сыртқы істер министрлігі шабуылды барынша қатаң түрде айыптап, оны халықаралық құқық пен Сирияның егемендігін ашық бұзу деп атады. Корольдік Сыртқы істер министрлігі халықаралық қауымдастықты Израильдің халықаралық құқықты бұзуына қарсы шаралар қабылдауға шақырды.
Біріккен Араб Әмірліктері де Израильдің әуе соққыларын қатаң айыптады. БАӘ Сирияның егемендігін бұзуға және оның қауіпсіздігі мен тұрақтылығына қауіп төндіруге қарсылық білдірді.
Мысыр да шабуылды айыптады. Елдің Сыртқы істер министрлігі Тель-Авивтің әрекеттері Сирияның егемендігі мен аумақтық тұтастығын, халықаралық құқықты және БҰҰ Жарғысын бұзатынын атап өтті. Каир мұндай әрекеттердің жалғасуы қауіпті шиеленіске әкеліп, өңірдегі қауіпсіздік пен бейбітшілікке қатер төндіруі мүмкін екенін ескертті.
БҰҰ Израильдің әуе соққыларын Сирияның аумақтық тұтастығы мен әуе кеңістігін «алаңдаушылық туғызатын бұзу» деп атады. БҰҰ Бас хатшысының өкілі Стефан Дюжаррик мұндай әрекеттер тоқтатылуы тиіс екенін мәлімдеді.
Парсы шығанағындағы Араб мемлекеттерінің ынтымақтастық кеңесі (ПШАМЫК) шабуылдарды Сирияның егемендігі мен аумақтық тұтастығын жол беруге болмайтын түрде бұзу деп қатаң айыптап, халықаралық қауымдастықты оларды тоқтатуға бағытталған шаралар қабылдауға шақырды.
Араб мемлекеттері лигасы да шабуылды айыптады. Ұйымның Бас хатшысы Набиль әл-Фахми Израильдің әрекеттерін арандатушылық әрі негізсіз деп атап, Израильді хаосты таратып, қақтығыс аймақтарын кеңейтіп отыр деп айыптады.
Пәкістан да әуе соққыларын қатаң айыптап, мұндай арандатушылық әрекеттерді халықаралық құқықты ашық бұзу және өңірдегі бейбітшілік пен тұрақтылыққа төнген қауіп деп бағалады. Исламабад Сирияның егемендігі мен аумақтық тұтастығын қолдайтынын растады.
АҚШ шабуылға қатысты «терең алаңдаушылық» білдірді. АҚШ-тың Сирия мен Ирак жөніндегі арнайы өкілі Том Баррак Вашингтонның әскери әдістердің орнына дипломатиялық үдерісті қолдауды жалғастыратынын айтты. Оның сөзінше, Сирия президенті Ахмед аш-Шараа үкіметі Израильмен арадағы шиеленісті бәсеңдетуге ұмтылысын бірнеше рет көрсетті.
