Сұрақ: Адамды өткен қателігі үшін жазғыру дұрыс па?
Жауап: Ислам – кешірім мен әділдік діні. Қателік жасау пенденің табиғатында бар нәрсе. Қателік жасап тәубе етіп, қателікті қайталамай, өзгеруге әрекет ету саналы адам ісі болуы керек.
Ал, оның өткен істерін қайта-қайта бетке басып, кінәлау, жазығру адамгершілік пен діни қағидаларға да қайшы келеді. Ислам тағылымында шынайы тәубе еткен, ісіне өкінген адамның өткен күнәсі кешірілетіні айтылған. Оны қазбалай беру адамды үмітсіздікке және жаңа өмір бастауына кедергі келтіруі мүмкін. Саналы әрбір адам уақыт өте келе адам ой-санасын өзгертіп, жақсы жаққа қарай түзеле алады. Жақсы болуға үміттеніп, әрекет ету қайырлы амалдардан.
Ал, адам жағымсыз ескі әдетін қоймаса, бұл оның жаман қасиетсіздігі болмақ. Ондай адамдардан алыс болғанымыз дұрыс.
Пайғамбарымыз (с.а.у.) хадисінде: «Кімде-кім бір мұсылманның айыптарын жауып жасырса, Алла Тағала да дүние мен ахиретте оның айыптары мен кемшіліктерін жасырады» деген.
Демек, тәубеге келген адамды қателігі үшін жазғыра бергеннен, артынан дұға ету қайырлы болмақ. Негізі, жақсылықты үміт етіп, басқалардың қатесін кешіре білу – адамдықтың белгісі.
Икрам АЙТАЕВ
