Сұрақ: Исламда тектілік жайлы айтылған ба?
Жауап: Тектілік қазақ танымында адал неке, адал ұрпақ өсіру, отбасылық құндылықтар және жақсы тәрбие мен саналы өмір салтының жемісі ретінде қаралған. Яғни, адам бойындағы асыл қасиеттердің ұрпақтан-ұрпаққа берілуі және жеті атаға дейін қыз алмау сынды тағылымды дүниелер.
Исламда адамның иманына, тақуалығы және көркем мінезі деп қарайды. Бұл жайлы Құран аяттары мен хадистерде баяндалған. Кейбір түсінікте тектілік асыл әулеттен шығу, ру, ата-баба сынды дүниелер көтерілгенімен адам алдындағы ең басты өлшем болып саналмайды. Исламда жақсы әулеттен шығу, тәрбиелі отбасында өсу игілік деп қаралады. Алла алдында адамның дәрежесі иманы, тақуалығы және жақсы амалдарымен өлшенеді. Ал, руымен, тегімен, дүниесімен немесе ата-бабасымен мақтану және өзгелерді төмен санау Исламда құпталған амал емес.
«Хужурат» сүресінің 13-аятында: «Әй, адам баласы! Шүбәсіз, сендерді бір ер, бір әйелден (Адам мен Хауадан) жараттық. Сондай-ақ бір-біріңді тануларың үшін тайпаларға, ұлттарға бөлдік. Ақиқатында, Алланың құзырындағы ең ардақтыларың – ең тақуаларың», – деген.
Демек, Исламда тектіліктің өлшемі жүректегі иман мен көркем мінез екен. Сонымен, өзге мәдениетке еліктемей салт-дәстүрімізге берік болып, тектілігімізді сақтай білейік.
Икрам АЙТАЕВ
