Сұрақ: Түс шариғи дәлел бола ала ма?
Жауап: Ислам дінінде түс көру арқылы шариғи дәлелдер мен үкімдер бекітілмейді. Түс тек бір нәрсені сездіру немесе білдіру ғана болуы мүмкін. Шариғи үкімдер Пайғамбарымыз (с.а.у.) кезінде толық кемелденген. «Мәида» сүресінің 3-аятында: «Бүгін діндеріңді толықтырдым және нығметімді тамамдадым. Сондай-ақ, сендерге Ислам дінін қоштап ұнаттым», деген. Демек, қандай да бір дүниелік немесе ақыреттік іс болса, оның шешімі шариғатымызда бар.
Шариғи дәлелдер Құран, сүннет, ижмағ, қияс т.б. негіздерінен алынады. Адамның түстері кейде өзі үшін сүйінші, ескерту немесе рухани әсер болуы мүмкін. Алайда бір адам түсінде бір нәрсе көрді екен деп, ол бүкіл мұсылмандар үшін діни дәлелдер мен үкімге айналмайды.
Егер біреу Пайғамбарды (с.а.у.) көріп, белгілі бір нұсқау алдым десе, ол нұсқау Құран мен сүннетке сай болса, жеке өзі үшін насихат ретінде қаралуы мүмкін, бірақ шариғи үкімдер мен дәлел ретінде қолданылмайды.
Демек, түс арқылы шариғи дәлелдер алынбайды және шариғи үкім бекітілмейді екен. Түс тек жеке адам үшін жақсы хабар немесе ескерту сипатында болуы мүмкін.
Икрам АЙТАЕВ
