Сұрақ: Саудада ант етуге бола ма?
Жауап: «Қасам» сөзінің ант, серт деген мағынасы бар. Дінде антты Алланы куә етіп, бір сөзді растау немесе бір істі жасауға уәде беру мағынасында қолданады.
Ант беру – адам мен Алланың арасындағы жауапкершілігі бар амал. Әдетте антты шындықты дәлелдеу үшін қолданады.
Исламда күнделікті сөйлеуде немесе ұсақ нәрселер үшін орынсыз ант беру құпталмаған іс. Қоғамда саудада жиі ант ішу – сенімсіздік белгісі ретінде қаралады. Ал біле тұра, өзінің мүддесі үшін өтірік айтып ант ішу үлкен күнә амал. Демек, орынсыз саудада, бір нәрсені сату немесе сатып алуда Алланы, дінді немесе қасиетті нәрсені күәға тартып, ант ішу – Исламда құпталмаған амал.
Адам шындықты антсыз-ақ айтуы керек. Шындық үшін де, пайда табу үшінде ант іше беру дұрыс амал емес.
Пайғамбарымыз (с.а.у.) хадисінде: «Сауда-саттықта көп ант іше бермеңдер! Өйткені ант-су ішу әу баста сауданы жақсы жүргізгенімен кейін бәрібір де түскен табысты берекесіз қылады», деген.
Ең дұрысы адал сауда жасап, Алладан берекесін сұрап, сенімділікпен жұмыс істеген абзал.
Икрам АЙТАЕВ
