Сұрақ: Имам жамағат намазын созып оқығаны дұрыс па?
Жауап: Исламда парыз намаздарын мешіттерде жамағатпен оқуда сауап бар. Хадистерде бөлінбей жамағатпен имамға ұйып намаз оқудың хикметтері айтылған. Жамағатпен намаз оқу арқылы мұсылмандар бір-бірімен танысып, араларында жылы қарым-қатынас күшейеді. Жағдайы келсе, ер кісілердің бес уақыт парыз намазды жамағатпен оқулары – бекітілген сүннет.
Исламда жамағатқа шыққан имам қысқа Құран сүрелерін оқып, барынша созбай, ауырлатпай, намазды жеңіл өткізгені абзал. Жамағатта түрлі жағдайдағы азаматтар, қарттары, сырқаттары және балалардың болуы, біреуінің дәретке қажеттілігі артуы, біреуінің асығыс шаруасының болуы сынды т.б. жағдайлардың кездесуі мүмкін. Сондықтан жамағатқа шыққан имам жеңілдетіп (орташа көлемде) намазды оқығаны абзал.
Пайғамбарымыз (с.а.у.) хадисінде: «Қайсыбірің жамағатқа имам болса, намазды созбай қысқа оқытсын, өйткені оның артында қарт кісілер, жас балалар және тығыз шаруасы барлар да тұрады», деген.
Икрам АЙТАЕВ
