Сұрақ: Мешіт әдептері қандай?
Жауап: Ислам – тәртіп пен мәдениетке негізделген дін. Елімізде ҚМДБ-на қарасты үш мыңға жуық мешіт тіркелген. Адамдардың діни рәсімдері дұрыс болуы үшін мешіттердің өзіндік бекіткен тәртіптері бар. Оны әр мұсылман білуге тиіс.
Мешіт қасиетті орын екендігін ұмытпауымыз керек. Әр мұсылман білуі тиіс мынадай әдептер бар: мешітке барарда дәрет алып, киімі таза әрі жинақты болуы керек, намаз кезінде телефонның шырылдауы басқа адамның құлшылығына кедергі келтірмеуге тиіс, киген киімі денені толық жауып, ұятты жерлерді көрсетпейтін болуы керек, киімде орынсыз жазулары мен суреттері болмағаны абзал, мешіт ішінде дауыс көтермей қатты сөйлемеу, қарқылдап күлмеу, намаз оқып жатқан адамның алдынан өтпеу, орын таласпау, қоқыс тастамау, аяқ киімді дұрыс қою, мешіт мүлкін ұқыпты пайдалану.
Сондай-ақ, жұма күндері көлігін кедергісіз жерге қою да әдептілікке сай амал. Демек, мешітке намазға баратын адам, өзгеге үлгі болатындай, өзін тәртіпке, кішіпейілдікке және сыйластыққа бейімдеуі қажет.
Икрам АЙТАЕВ
