Сұрақ: Қартайғанда құлшылыққа бет бұрамын деген дұрыс па?
Жауап: Алла адамға қанша өмір берді, соны көреді. Өз уақытымен орындалған құлшылықтардың адамның рухани өміріне пайдасы бар. Кейбір азаматтар негізсіз «уақытым болмады», «уақыты келгенде имандылыққа бет бұрамын», «білмедім» деген сөздермен намаз, ораза сынды құлшылық амалдарына мән бермей, уақыттарын босқа өткізіп алатыны бар.
Адам уақытты босқа өткізбей, әр сәттерді дұрыс пайдаланып, шамасы келгенше иман мен ізгі амалға асығуы қайырлы. Дінге қатты беріліп, бұл дүниенің жұмыстарын тастауды Ислам қолдамайды. Мұндай әрекет фанатизмге соқтырады.
Пайғамбарымыздың (с.а.у.) хадисінде: «Алла Тағала алпыс жас ғұмыр берген құлының ешбір сылтауына құлақ аспайды» деген. Бұл хадистің мазмұнынан пайғамбар жасына келгенше құлшылық жасамаған адамның «тағы да біраз өмір сүрсем, құлшылық жасар едім» деген сылтауы қабылданбайтынын меңзеп тұр.
Демек, алпыс жас – адамға ақ пен қараны ажыратуға, ақиқатты тануға, тәубе етуге, ізгі амал жасауға жеткілікті уақыт. Сондықтан құлшылық амалдарын кейінге қалдыра бермей, шама келген жастан орындалғаны дұрыс.
Икрам АЙТАЕВ
